1.11.2019, 9:43
Қараулар: 1684
Әйелдер форумы өтті

Әйелдер форумы өтті

 

«Нарын шуағы» әйелдер қоғамдық бірлестігі және аудан әкімдігінің қолдауымен VI «Еңбек әйелдері – еліміздің басты құндылығы» атты форум өтті.

 

Форумның шымылдығы  жылдағы дәстүр бойынша мәдениет үйінің фойесінде ұйымдастырылған «Тәттілер» жәрмеңкесімен  түрілді. Сайқындық нәзікжандылармен қоса  Мұратсай, Орда, Ұялы, Саралжын, Т.Масин ауылдық округтерінен  ат арытып жеткен әйелдер қауымы  тәтті өнімдерін, қолөнер бұйымдарының алуан түрлерін  келушілер назарына ұсынды. «Аудан көлемінде  әйелдер саны  8097-ні құраса, 250 қыз-келіншек медицина, 955-і білім саласында қызмет атқарады. 285-і  шағын және орта бизнесті игергендер». Осылай деп  форумның ресми  бөлімінде сөз бастаған  «Нарын шуағы» әйелдер қоғамдық бірлестігінің  төрайымы  әрі шара модераторы Гүлжан Бисекенова  аудандағы гендерлік саясаттың  іске асырылу барысын, отбасылық құндылықтарды насихаттау, зорлық-зомбылықтың алдын алу т.б бірлестіктің мұрындық болуымен өткізілген жобалары жөнінде тарқатып айтты.

Өз кезегінде аудандық жұмыспен қамту және әлеуметтік бағдарламалар бөлімінің басшысы Шыңғыс Абдоллин әйел адамдарды жұмыспен қамту бойынша атқарылған жұмыстарды баяндады. Оның айтуынша, былтырғы жылы 345 әйел жұмыспен қамтылса, биыл 372  әйелдің нәпәқа табуына мүмкіндік беріліпті. Тарқатып жазар болсақ,  соның 93-і   тұрақты қызметке тұрса,   51-і әлеуметтік жұмыс орындары,  53 қыз-келіншек  жастар практикасы  негізінде екі қолға бір күрек тауыпты,  170-і қоғамдық жұмыстарға тартылса,  29-ы қысқа мерзімді кәсіптік оқуға жолданыпты. Бұдан соң мінберге Бөкей ордасы колледжінің директоры Бағдат Лұқпанов шығып, колледжді тәмамдаған қыз балалардың қызметке орналасуы, іскерлік белсенділіктері және аталмыш оқу орнындағы қыз тәрбиесіне арналған   шараларды тілге тиек етті. Ұялы ауылдық округіндегі Аналар кеңесі төрайымының орынбасары Шынар Сәбирова  жыл бойына атқарылған шараларға шолу жасады. Ұялы ауылы әйелдер форумын үш жыл қатарынан өткізіп, кеңес жұмысын асқан жауапкершілікпен атқарып отырған бірден бір ауыл. Жалғасты жұмыс, үлкен жауапкершіліктің нәтижесі болар, аудан атынан облыс орталығында өткен отбасылық байқауларға қатысқан ұялылықтардың жүлдесіз қайтқан кезі жоқ.

«Ақжүніс» республикалық  көп балалы аналар бірлестігінің  ауданымыздағы өкілі Гүлнәз Құсалиева, «Асыл ана-2019»  байқауының жеңімпазы атанған көп балалы ана  Өмірбақыт Нанаевалар  да тақырып төңірегіндегі  ой-пікірлерін ортаға салды.  «Қызыл ай»  қоғамдық бірестігінің бүгіні мен ертеңін  жетекшісі  Нәсіп Нұркенова жеткізіп, өзгенің өміріне бейжай қарамайтын  жомарт жүрек жандар  еріктілер қатарынан табылса деген тілегін де жасырмады. Аудан әкімінің орынбасары Лариса Қайырғалиева қазақ қоғамындағы іскер әйелдердің мәртебесі мен ролі, гендерлік теңдікті нығайту жәйін сөз етті.

Шара соңында ауданның әлеуметтік-экономикалық дамуына үлес қосып жүрген бір топ бастамашыл әйелдер  аудан әкімі Нұрлан Сағынтайұлы мен «Нарын шуағы» әйелдер қоғамдық бірлестігінің төрайымы Гүлжан Исағалиқызының атынан алғыс хаттармен марапатталды. Сондай-ақ,  қайырымдылық  жәрмеңкесінен түскен қаржы Саралжын ауылындағы мұқтаж жанұяға берілетіндігі қаперге беріліп, сол округтің әкімі Ерлан Ермекқалиевке табысталды.

 Арайлым ЕСМАҒҰЛ